Heiðmörk-Hvaleyravatn.

Göngur í Heiðmörk og við Hvaleyrarvatn hefjast næsta mánudag.
Sjá gönguáætlun.
Sigga

Leirvogsá-Þverárkotsháls

17 voru mættir í þessa líka fínu göngu í dag. Veðrið lék við okkur, hlýtt og gott þótt smá skúrir hafi komið í lokin. Yndisfögur leið upp með Leirvogsánni og  útsýnið fagurt  af                        Þverárkotshálsinum.(194 m)
Gangan tók 4 tíma og var rúmlega 10 km.
Takk fyrir góðan dag :)
Sigga

Varmidalur-Þverárkotsháls

Næsta laugardag verður gengin falleg gönguleið upp með Leirvogsá frá Varmadal og að Þverárkotshálsi í Mosó.  Gangan er 9-10 km og tekur 3 tíma.
Nesti og VAÐSKÓR.
Mæting við Iðnsk. Hf. kl. 9 eða við Krónuna í Mosó kl. 9:20.
Sigga

Akrafjallið

Akrafjallið og umhverfi þess skartaði sínu fegursta í dag.  Sól skein í heiði, ekki ský á himni og vindur hægur, í byrjun var þoka með ströndinni og inn Hvalfjörðin og sveipaði hún umhverfi sitt dulúð.  Þegar þokan var horfin blasti við okkur þvílík fegurð, skjannahvítir kollar jöklanna báru við bláan himininn.  Gengið var upp frá Fellsenda og uppá Bungu, þaðan horfðum við yfir Háahnúk, Berjadal og Geirmundartind svo þekktustu kennileiti séu nefnd.  Við nutum þess að vera til og horfa á náttúruna.  Gangan reyndist 9,6 km og tók 4 1/2 klst.  14 tóku þátt.
Vala

Akrafjall frá Fellsenda

Gengið upp þægilegan veg frá austurenda fjallsins á Bungu (572 mys).  Mæting við Iðnskólann í Hafnarfirði kl. 9 eða við Krónuna í Mosó kl. 9.20.  Hálfsdagsferð.
Vala

Regn og sól

Það voru 18 sem mættu í göngu dagsins frá Grafarvogskirkju og að Reynisvatni.
Smá rigning  var í fyrstu en svo kom sólin fram úr skýjunum og yljaði okkur vel.
Genginn var rúmlega 10 km hringur í fallegu umhverfi Grafarholtsins og Reynisvatnsins og tók gangan tæpa 3 klst. með smá nestisstoppi. Eftir göngu var haldið í Hafnarfjörðinn þar sem okkur var boðið uppá dýrindis súpu og köku í eftirrétt hjá Ólu.
Takk fyrir okkur elsku Óla.
Sigga

Grafarvogur-Reynislvatn

Næsta laugardag göngum við 10-11 km. hring frá Grafarvogskirkju, um Grafarholtið og kringum Reynisvatn, ca 3 klst. Hafa með sér léttan nestisbita. Mæting við Iðnsk. í Hf. kl. 9 eða við Grafarvogskirkju kl. 9:15,
Veðurspáin er þokkalega góð.
Sigga

Óla 70 ára.

Þessi flotta Fjallafreyja er sjötug í dag. Við sendum henni heillaóskir í tilefni dagsins :)

Dásamlegur dagur

Ókum úr þokunni í Hafnarfirði upp fyrir Gunnarshólma þar sem gangan hófst.  Þarna var sól og blíða, himininn alveg heiður og logn.  Gengið var með Hólmsánni að Nátthagavatni og þaðan að kröftugum fossum Fossvallaár.  Gáfum okkur góðan tima til að njóta stórglæsilegra fossanna.  Til baka fórum við með brúnum Elliðakotsbrekkna og síðan eftir veginum í gegnum byggðina.  Gangan reyndist 8,6 km og tók 3,45 klst.  11 mættu til göngu.
Vala

Hólmsá

Næsta laugardag verður gengið með efsta hluta Hólmsár að Nátthagavatni í Lækjarbotnum 7-8 km hringur.  Mjög skemmtilegt svæði.  Ætla má að gangan taki góða 3 tíma, en það er vel þess virði að gefa sér þann tíma svo hægt sé að ganga að kröftugum fossum sem þarna eru.  Verið í góðum skóm þar sem gönguland er á köflum þýft og grýtt og jarðvegur víða blautur núna.  Mæting við Iðnskólann í Hafnarfirði kl. 9.
Vala

Fossvallaá

Nátthagavatn

Blautt

Við vorum 5 sem létum vaða á Helgafellið í roki og rigningu, en ca 10°C.  Undanfarinn okkar sagði vindinn mjög kröftugan á efsta hlutanum þannig að snúið var við þegar að þeim kafla kom.  Það sem þetta var hressandi og við kát að göngu lokinni.
Vala

Helgafell

Þriðjudag kl. 17.30 frá Kaldárseli.
Vala